ഓസ്ട്രേലിയയ്ക്കെതിരായ അവസാന ക്രിക്കറ്റ്  ടെസ്റ്റിൽ ഇന്ത്യയ്ക്കായി വിജയ റൺ ബൗണ്ടറിയിലൂടെ ഋഷഭ് പന്ത് നേടുമ്പോൾ അതിലേറ്റവും സന്തോഷിച്ച വ്യക്തികളിലൊരാളാണ്  താനെന്ന് ഇന്ത്യൻ ഓൾറൗണ്ടർ വാഷിങ്ടൺ സുന്ദർ. ഓസ്‌ട്രേലിയക്ക് എതിരെ ഗാബ്ബയിൽ നടന്ന മത്സരം ഇന്ത്യ : ഓസ്ട്രേലിയ ടെസ്റ്റ്  പരമ്പരയിലെ നിർണായക മത്‌സരമായിരുന്നു .ഈ ടെസ്റ്റിലാണ് വാഷിംഗ്‌ടൺ സുന്ദർ  തന്റെ  ടെസ്റ്റ് അരങ്ങേറ്റം കുറിച്ചത് .

അരങ്ങേറ്റ ടെസ്റ്റിൽ മിന്നും പ്രകടനമാണ് ബാറ്റ് കൊണ്ടും പന്ത് കൊണ്ടും സുന്ദർ കാഴ്ചവെച്ചത് .ഇന്ത്യയുടെ ജയത്തിന്  അരങ്ങേറ്റക്കാരൻ സുന്ദർ നിർണായക പങ്ക് വഹിച്ചിട്ടുണ്ട്. നാലാം ടെസ്റ്റിൽ അരങ്ങേറ്റം കുറിച്ച താരം 84 റൺസും 4 വിക്കറ്റുകളും സ്വന്തമാക്കി. രണ്ടാമിന്നിങ്സിൽ പന്തിനൊപ്പം ആറാം വിക്കറ്റിൽ 53 റൺസിന്റെ നിർണായക കൂട്ടുകെട്ട് പടുത്തുയർത്താനും താരത്തിന് കഴിഞ്ഞു.നേരത്തെ ആദ്യ ഇന്നിങ്സിൽ ഓസീസ്  ഒന്നാം ഇന്നിംഗ്സ് സ്കോർ പിന്തുടർന്ന് ഇറങ്ങിയ  ഇന്ത്യ  6 വിക്കറ്റിന് 186 റണ്‍സെന്ന നിലയില്‍ പതറുകയായിരുന്നു .ഒരുവേള ഇന്ത്യ വലിയൊരു ലീഡ് വഴങ്ങുമെന്ന് തോന്നി .എന്നാൽ  അരങ്ങറ്റക്കാരനായ വാഷിങ്ടണ്‍ സുന്ദറും താക്കൂറും ഏഴാം വിക്കറ്റ് ബാറ്റിംഗ് കൂട്ടുകെട്ടിലൂടെ  ഇന്ത്യയുടെ  രക്ഷക്കെത്തുകയായിരുന്നു.
ഏഴാം വിക്കറ്റില്‍ ഈ ജോടി 123 റണ്‍സ് ടീം സ്കോറിലേക്ക്  കൂട്ടിച്ചേര്‍ത്ത് ഓസീസുമായുള്ള ഇന്ത്യയുടെ അകലം കുറയ്ക്കുകയും ചെയ്തു.

ബ്രിസ്‌ബേൻ ടെസ്റ്റിലെ മനോഹര  നിമിഷത്തെ കുറിച്ച് ഇന്ത്യയിലേക്ക് തിരിച്ചെത്തിയ ശേഷം തുറന്ന് പറയുകയാണ് സുന്ദർ ” തന്റെ ജീവിതത്തിലെ ഏറ്റവും പ്രിയപ്പെട്ട നിമിഷമാണത് എന്ന് വാഷിങ്ടൺ സുന്ദർ വ്യക്തമാക്കി. ‘ഋഷഭും ഞാനും അണ്ടർ 19 ഇന്ത്യൻ ടീമിൽ ഒരുമിച്ച് കളിച്ചിട്ടുണ്ട്. ഓസ്ട്രേലിയയ്ക്കെതിരേ ഇന്ത്യ ജയിക്കാനുള്ള പ്രധാന കാരണം അദ്ദേഹത്തിന്റെ തകർപ്പൻ ബാറ്റിങ്ങാണ്. ഋഷഭ് പന്ത് നേടിയ വിജയറൺ എന്റെ ജീവിതത്തിലെ ഏറ്റവും മികച്ച നിമിഷമാണ്. ഗാബയിൽ ഇന്ത്യൻ കൊടിയും പിടിച്ച് നടന്നത് ജീവിതത്തിൽ ഒരിക്കലും മറക്കാനാവില്ല’-സുന്ദർ പറഞ്ഞു .

ഓസ്‌ട്രേലിയക്കെതിരായ ടെസ്റ്റ് ക്രിക്കറ്റ്  പരമ്പരയില്‍ ഇന്ത്യന്‍ വിജയത്തില്‍ ഏറെ  നിര്‍ണായക പങ്കുവഹിച്ച താരങ്ങളിലൊരാളായിരുന്നു യുവ ഓപ്പണര്‍ ശുഭ്മാന്‍ ഗില്‍. പരമ്പരയിലെ രണ്ടാം മത്സരത്തിൽ ഇന്ത്യക്കായി ടെസ്റ്റ് അരങ്ങേറ്റം കുറിച്ച ഗിൽ പര്യടനത്തിനിടെ  ഓസ്‌ട്രേലിയയില്‍ തനിക്ക് നേരിടേണ്ടി വന്ന  വെല്ലുവിളികളെക്കുറിച്ച് ഇപ്പോൾ  വെളിപ്പെടുത്തിയിരിക്കുകയാണ്  . ഓസീസ്  പരമ്പര പൂര്‍ത്തിയാക്കി
നാട്ടില്‍ തിരിച്ചെത്തിയ ശേഷം സംസാരിക്കുകയായിരുന്നു   21കാരനായ ഗില്‍.

നേരത്തെ മെല്‍ബണില്‍ നടന്ന രണ്ടാം ടെസ്റ്റില്‍ പ്രിത്വി ഷാ ക്ക് പകരം ഓപ്പണിങ്ങിൽ  ഇറങ്ങിയായിരുന്നു ഗില്ലിന്റെ അരങ്ങേറ്റം. മികച്ച പ്രകടനത്തിലൂടെ പരമ്പരയിലെ ശേഷിച്ച ടെസ്റ്റുകളിലും താരം സ്ഥാനം നിലനിര്‍ത്തുകയും ചെയ്തു. ആറു ഇന്നിങ്‌സുകളില്‍ നിന്നും രണ്ടു ഫിഫ്റ്റികളടക്കം 51.8 ശരാശരിയില്‍ 259 റണ്‍സ് ഗില്‍ അടിച്ചെടുത്തിരുന്നു .
ടെസ്റ്റ് പരമ്പരയില്‍ ബാറ്റ് ചെയ്യവെ ഓസീസിന്റെ മുന്‍നിര സ്പിന്നര്‍  കൂടിയയായ  ലിയോണ്‍ തന്നെ ഭീഷണിപ്പെടുത്തിയിരുന്നതായി ഇപ്പോൾ  വെളിപ്പെടുത്തിയിരിക്കുകയാണ് ഗില്‍. ഞാന്‍ പക്ഷെ വളരെ കൂളായി അവയെ നേരിട്ടു. ശാന്തനായി ക്രീസിൽ ബാറ്റിംഗ് തുടര്‍ന്ന ഞാന്‍ ബാറ്റിലൂടെ മറുപടി നല്‍കാനാണ് ആഗ്രഹിച്ചത്. ഓസീസിന്റെ സ്ലെഡ്ജിങ് ഒരുതരത്തിലും ഇന്ത്യന്‍ ടീമിനെ ഭയപ്പെടുത്തിയിരുന്നില്ലെന്നും ഗില്‍ വിശദമാക്കി.

തന്റെ കൂടെ രണ്ടാം  ടെസ്റ്റിൽ അരങ്ങേറ്റം കുറിച്ച സിറാജിനെ കുറിച്ചും  ഗിൽ വാചാലനായി .സിറാജ് പാജി മഹാനായ വ്യക്തിയാണ്. ഒരു തരത്തിലുള്ള കാര്യങ്ങളും അദ്ദേഹത്തിന്റെ ബൗളിങിനെ ബാധിച്ചില്ല, മാത്രമല്ല വളരെ നന്നായി പെര്‍ഫോം ചെയ്യുകയും ചെയ്തു. പിതാവിന്റെ വിയോഗവും കാണികളുടെ മോശം പെരുമാറ്റവുമെല്ലാം നേരിട്ടിട്ടും സിറാജ് തന്റെ ഏറ്റവും മികച്ച
പ്രകടനം നടന്ന കളിക്കളത്തില്‍ പുറത്തെടുത്തതായും ഗില്‍ കൂട്ടിച്ചേര്‍ത്തു.

ബ്രിസ്ബണിലെ ഗാബയില്‍ നടന്ന പരമ്പരയിലെ  നാലാമത്തെയും അവസാനത്തെയും ടെസ്റ്റില്‍ സെഞ്ച്വറി നേടാന്‍ കഴിയാതിരുന്നതില്‍ നിരാശയുണ്ടെന്നു  ഓപ്പണർ ഗില്‍ വ്യക്തമാക്കി. രണ്ടാമിന്നിങ്‌സില്‍ 91 റണ്‍സില്‍ നില്‍ക്കെയായിരുന്നു ഗില്‍ പുറത്തായത്. ഓഫ്‌ സ്പിന്നർ നഥാൻ  ലിയോണിനെതിരേ വൈഡ് ബോളില്‍ ഷോട്ടിനു ശ്രമിച്ച ഗില്ലിന്റെ ബാറ്റില്‍ എഡ്ജ് ചെയ്ത ബോള്‍ സ്ലിപ്പില്‍ സ്മിത്തിന്  ക്യാച്ചാവുകയായിരുന്നു.

നാലാം ടെസ്റ്റിലെ ബാറ്റിങ്ങിനെ കുറിച്ച് ഗിൽ പറയുന്നത് ഇങ്ങനെ “ഞാന്‍ 
ഏറെ നന്നായി ബാറ്റ് ചെയ്തു  കൊണ്ടിരിക്കുകയായിരുന്നു. സ്‌കോര്‍ 90 കടന്നതോടെ  അല്‍പ്പം പരിഭ്രമമുണ്ടായി. ഇതേ  തുടർന്നാണ് ഞാൻ  മോശം ഷോട്ട് കളിക്കുകയും ചെയ്തത് . സത്യത്തിൽ
അങ്ങനെയൊരു ഷോട്ട് കളിച്ച് വിക്കറ്റ് നഷ്ടപ്പെടുത്തിയതില്‍ നിരാശയുണ്ട്. ഇന്ത്യ ജയിച്ച ഈ ടെസ്റ്റില്‍ സെഞ്ച്വറി കൂടി നേടിയിരുന്നെങ്കില്‍ അത് കേക്കിന്  മുകളില്‍ ചെറി വയ്ക്കുന്നതുപോലെ മനോഹരമായി മാറുമായിരുന്നുവെന്നും ഗില്‍ കൂട്ടിച്ചേര്‍ത്തു.

ഓസ്‌ട്രേലിയയിലെ  ഐതിഹാസിക ടെസ്റ്റ് പരമ്പര നേട്ടത്തിന് പിന്നാലെ ആറ് ഇന്ത്യൻ താരങ്ങൾക്ക് ഥാർ-എസ്‌യുവി സമ്മാനിച്ച് ആനന്ദ് മഹീന്ദ്ര ഗ്രൂപ്പ്. ടെസ്റ്റ് പരമ്പരയിൽ മുന്നും  പ്രകടനം കാഴ്ച്ചവച്ച ആറ് പേർക്കാണ് ആനന്ദ് മഹീന്ദ്രയുടെ സമ്മാനം. ഓപ്പണർ ശുഭ്മാൻ ഗിൽ, ഓൾറൗണ്ടർ വാഷിംഗ്ടൺ സുന്ദർ, ബൗളർമാരായ സിറാജ്, ടി നടരാജ്, നവ്ദീപ് സൈനി, ഷാർദുൽ താക്കൂർ എന്നിവർക്കാണ് അപ്രതീക്ഷിത സമ്മാനം നൽകുവാൻ മഹീന്ദ്ര ഗ്രൂപ്പ് തീരുമാനം കൈകൊണ്ടത് .

ഓസ്ട്രേലിയക്കെതിരായ ടെസ്റ്റ് പരമ്പരയില്‍ തിളങ്ങിയ ആറ് ഇന്ത്യന്‍ താരങ്ങള്‍ക്ക് മഹീന്ദ്രയുടെ ഏറ്റവും പുതിയ എസ്‌യുവി വാഹനമായ ‘ഥാര്‍’ സമ്മാനമായി നല്‍കുമെന്ന് മഹീന്ദ്ര ഗ്രൂപ്പ് ചെയര്‍മാന്‍ ആനന്ദ് മഹീന്ദ്ര തന്റെ ട്വിറ്ററിലൂടെ അറിയിക്കുകയായിരുന്നു .
അസാധ്യമായത് നേടിയെടുക്കാന്‍ ഇനി വരുന്ന ഭാവി തലമുറക്ക് കൂടി പ്രചോദനം ആകും എന്നതിനാലാണ്  ആറ് യുവതാരങ്ങള്‍ക്കും സമ്മാനം നല്‍കുന്നതെന്നും ആനന്ദ് മഹീന്ദ്ര ട്വീറ്റിലൂടെ അറിയിച്ചു .

പ്രതിസന്ധികളെയെല്ലാം മറികടന്ന് വിജയസോപാനത്തില്‍ കയറിയ ഈ ഇന്ത്യൻ  താരങ്ങളെല്ലാം  പരമ്പരയിലെ മികവാർന്ന പ്രകടനത്തിലൂടെ ജീവിതത്തിന്‍റെ ഏത് തരം  മേഖലയിലുള്ളവര്‍ക്കും യഥാര്‍ത്ഥ പ്രചോദനമാണെന്നും ഇവര്‍ക്കെല്ലാം മഹീന്ദ്രയുടെ ഏറ്റവും പുതിയ ഥാര്‍ എസ്‌യുവി സമ്മാനമായി നല്‍കുന്നതില്‍ വ്യക്തിപരമായും തനിക്കും  ഏറെ സന്തോഷമുണ്ടെന്നും ആനന്ദ് മഹീന്ദ്ര വ്യക്തമാക്കി.സ്വന്തം കഴിവില്‍ വിശ്വാസമര്‍പ്പിച്ച് അധികമാരും സഞ്ചരിക്കാത്ത പാതയിലൂടെ യാത്ര ചെയ്ത് വിജയം വെട്ടിപ്പിടിച്ചതിനാലാണ് ഇവര്‍ക്ക് സമ്മാനം നല്‍കുന്നതെന്നും ആനന്ദ് മഹീന്ദ്ര ട്വിറ്ററില്‍ പറഞ്ഞു.

നേരത്തെ  പേസർ താക്കൂർ ഒഴികെയുള്ള അഞ്ച് പേരും ഓസ്‌ട്രേലിയയ്‌ക്കെതിരായ ടെസ്റ്റ് പരമ്പരയിലാണ് ഇന്ത്യയ്ക്കായി ടെസ്റ്റിൽ  ആദ്യമായി കളത്തിലിറങ്ങിയത്. 13 വിക്കറ്റ് സ്വന്തമാക്കിയ താരമാണ് സിറാജ്. ഷാർദുൽ താക്കൂറും സുന്ദറും നിർണായക പ്രകടനം കാഴ്ചവച്ചു. ശുഭ്മാന്റെ ബാറ്റിംഗും ടി നടരാജന്റെ  ബൗളിംഗും കളിയിൽ ഏറെ ശ്രദ്ധിക്കപ്പെട്ടിരുന്നു. ഓസീസ് പര്യടനത്തിന് ശേഷം നാട്ടിൽ തിരികെയെത്തിയ ഇന്ത്യൻ താരങ്ങൾക്കെല്ലാം വലിയ സ്വീകരണമാണ് ജന്മനാടുകളിൽ ലഭിക്കുന്നത് .