ഐസിസി ടി20 ലോകകപ്പിനു മുന്നോടിയായുളള പരിശീലന മത്സരങ്ങളിൽ ടീം ഇന്ത്യ, ഓസ്‌ട്രേലിയയെയും ന്യൂസിലൻഡിനെയും നേരിടും. ഒക്ടോബറിൽ ഓസ്‌ട്രേലിയയിൽ നടക്കുന്ന ഐസിസി പുരുഷ ടി20 ലോകകപ്പിന് മുന്നോടിയായി 16 ടീമുകൾക്കുമുള്ള സന്നാഹ മത്സരങ്ങൾ ഐസിസി വ്യാഴാഴ്ച പ്രഖ്യാപിച്ചു.
ആദ്യ റൗണ്ട് ടീമുകളുടെ സന്നാഹ മത്സരം ഒക്ടോബർ 10 മുതൽ 13 വരെ മെല്‍ബണില്‍ നടക്കും. സൂപ്പർ 12 ഘട്ടത്തിൽ ആരംഭിക്കുന്ന ടീമുകൾ ഒക്ടോബർ 17, 19 തീയതികളിൽ ബ്രിസ്‌ബേനിൽ രണ്ട് മത്സര ദിവസങ്ങളിലായി എല്ലാ സന്നാഹ മത്സരങ്ങളും കളിക്കും. ഈ മത്സരങ്ങൾ ഗാബയിലും അലൻ ബോർഡർ ഫീൽഡിലും നടക്കും.
ഒക്ടോബര്‍ 17 ന് ഓസ്ട്രേലിയയേയും ഒക്ടോബര്‍ 19 ന് ന്യൂസിലന്‍റുമായാണ് ഇന്ത്യയുടെ മത്സരങ്ങള്‍. ഒക്ടോബര്‍ 16 ന് ശ്രീലങ്ക – നമീബിയ പോരാട്ടത്തിലൂടെയാണ് ടി20 ലോകകപ്പ് ആരംഭിക്കുന്നത്.
