ഇന്ത്യയുടെ മൂന്നു മത്സരങ്ങളടങ്ങിയ സൗത്താഫ്രിക്കന്‍ ഏകദിന പരമ്പരക്ക് തുടക്കമാകും. സീനിയര്‍ താരങ്ങള്‍ ഓസ്ട്രേലിയന്‍ ലോകകപ്പിനു പോകുന്നതിനാല്‍ രണ്ടാം നിര ടീമുമായാണ് ഇന്ത്യ എത്തുന്നത്. ശിഖാര്‍ ധവാനാണ് ഇന്ത്യയുടെ നായകന്‍.
അടുത്ത വര്‍ഷം ഇന്ത്യയില്‍ ഏകദിന ലോകകപ്പ് നടക്കാനിരിക്കെ ഈ പരമ്പര വളരെ പ്രധാനപ്പെട്ടതാണെന്ന് ധവാന്‍ പറഞ്ഞു. ” മികച്ച ടീമിനെതിരെ കളിക്കുമ്പോള്‍ യുവതാരങ്ങള്‍ക്ക് കൂടുതല്‍ എക്സ്പോഷര്‍ ലഭിക്കും. ഇത് അവരുടെ അനുഭവസമ്പത്തും ആത്മവിശ്വാസവും കൂട്ടും. കൂടുതല്‍ കളിക്കുമ്പോള്‍ തെറ്റുകളില്‍ നിന്നും പഠിക്കും ” മത്സരത്തിനു മുന്നോടിയായുള്ള പത്ര സമ്മേളനത്തില്‍ ധവാന്‍ പറഞ്ഞു.
തന്‍റെ അറിവുകള്‍ യുവതാരങ്ങള്‍ക്ക് കൈമാറാന്‍ ആഗ്രഹിക്കുന്നുണ്ടെന്നും പുതിയ ഉത്തരവാദിത്വങ്ങള്‍ അവസരങ്ങളായി ആണ് കാണുന്നതെന്നും ധവാന്‍ പറഞ്ഞു. അടുത്ത വര്‍ഷത്തെ ഏകദിന ലോകകപ്പ് കളിക്കുക എന്നതാണ് തന്‍റെ ലക്ഷ്യമെന്നും ധവാന്‍ കൂട്ടിചേര്‍ത്തു.
” 2023 ഏകദിന ലോകകപ്പാണ് എന്‍റെ ലക്ഷ്യം. എന്‍റെ ശരീരത്തെ ഫിറ്റായി നിര്‍ത്താനും നല്ല മാനസികവസ്ഥയില്‍ ഇരിക്കാനുമാണ് എന്‍റെ ആഗ്രഹം ” ശിഖാര്‍ ധവാന്‍ കൂട്ടിചേര്‍ത്തു.
