മുംബൈ ക്രിക്കറ്റ്‌ ടെസ്റ്റിൽ വീണ്ടും ഇന്ത്യൻ ബാറ്റ്‌സ്മാന്മാർക്ക് വെല്ലുവിളി ഉയർത്തി കിവീസ് സ്പിന്നർ അജാസ് പട്ടേൽ. രണ്ടാം ദിനം വമ്പൻ ഒന്നാം ഇന്നിങ്സ് സ്കോർ ലക്ഷ്യമാക്കി കളിക്കാനായി എത്തിയ ഇന്ത്യൻ ടീമിന് തുടക്കത്തിൽ തന്നെ ഡബിൾ സ്ട്രൈക്ക് നൽകി അജാസ് പട്ടേൽ തന്റെ ടെസ്റ്റ്‌ കരിയറിലെ മൂന്നാം 5 വിക്കറ്റ് നേട്ടം കരസ്ഥമാക്കിയപ്പോൾ എല്ലാവരിലും വളരെ അധികം ചിരിപടർത്തിയത് ഓഫ് സ്പിന്നർ അശ്വിന് നഷ്ടമായ വിക്കറ്റാണ്.
രണ്ടാം ദിനത്തിൽ ബാറ്റിങ് ആരംഭിച്ച ഇന്ത്യക്ക് മികച്ച ഫോമിലുള്ള വൃദ്ധിമാൻ സാഹയെ രണ്ടാം ഓവറിൽ തന്നെ നഷ്ടമായപ്പോൾ അടുത്ത ബോളിൽ തന്നെ അശ്വിനും കിവീസ് സ്പിൻ ബൗളർ അജാസ് പട്ടേലിന്‍റെ സ്പിന്‍ മികവിന് മുൻപിൽ വീഴുകയായിരുന്നു.
ഒന്നാം ദിനത്തിൽ നാല് വിക്കറ്റുകൾ വീഴ്ത്തിയ ആത്മവിശ്വാസത്തിലെത്തിയ അജാസ് പട്ടേൽ രണ്ടാമത്തെ ദിനം ആദ്യ ഓവറിൽ തന്നെ സാഹയെ വിക്കറ്റിന് മുന്നിൽ കുരുക്കിയപ്പോൾ അടുത്ത ബോളിൽ തന്നെ അശ്വിന്റെ കുറ്റി തെറിച്ചു. മനോഹരമായ അജാസ് പട്ടേലിന്‍റെ ബോളിൽ അശ്വിന്റെ ഓഫ് സ്റ്റമ്പ് തെറിച്ചു. എന്നാൽ ഈ സമയം എന്താണ് സംഭവിച്ചതെന്ന് മനസ്സിലാക്കാതെ പോയ അശ്വിൻ കിവീസ് താരങ്ങളുടെ സെലിബ്രേഷൻ കണ്ട ശേഷം മൂന്നാം അമ്പയർക്ക് റിവ്യൂ നൽക്കാനായി കൈകകൾ ഉയർത്തുകയായിരുന്നു.
അതേസമയം അശ്വിന്റെ ഓഫ് സ്റ്റമ്പ് തെറിച്ചതാണ് എന്നത് എല്ലാവർക്കും ആ നിമിഷം വ്യക്തമായിരുന്നു. അശ്വിന്റെ ഈ ഒരു സർപ്രൈസ് റിവ്യൂ ഒരുവേള കിവീസ് താരങ്ങളെയും നോൺ സ്ട്രൈക്ക് എൻഡിലെ മായങ്ക് അഗർവാളിനെയും ഞെട്ടിച്ചു. അശ്വിൻ തന്റെ ബാറ്റിൽ കൊണ്ട ശേഷം കീപ്പർ പിടിച്ചതിനാണ് ഔട്ട്‌ വിധിച്ചതെന്ന് കരുതിയാണ് റിവ്യൂ വിളിച്ചതെന്ന് വ്യക്തം. ശേഷം ഇന്ത്യൻ ഡ്രസ്സിംഗ് റൂമിൽ എത്തിയ അശ്വിൻ ആ ബോളിൽ എന്താണ് സംഭവിച്ചതെന്ന് പല തവണ പരിശോധിക്കുന്നത് കാണുവാൻ സാധിച്ചു.
