2022 ലെ ഏഷ്യാ കപ്പിന് മുന്നോടിയായി, അഫ്ഗാനിസ്ഥാന്റെ സ്റ്റാർ സ്പിന്നർ റാഷിദ് ഖാൻ, എന്തുകൊണ്ടാണ് വിരാട് കോഹ്ലി ആധുനിക കാലഘട്ടത്തിലെ ഏറ്റവും മികച്ച കളിക്കാരിലൊരാളായതെന്ന് പറയാന്‍ ഒരു
സംഭവം വെളിപ്പെടുത്തി. റോയൽ ചലഞ്ചേഴ്‌സ് ബാംഗ്ലൂരും ഗുജറാത്ത് ടൈറ്റൻസും തമ്മിലുള്ള ഐപിഎൽ 2022 മത്സരത്തിന്റെ തലേന്ന് കോഹ്‌ലിയുടെ തയ്യാറെടുപ്പുകൾ കണ്ട് അമ്പരന്നു പോയെന്നാണ് റാഷിദ് ഖാന്‍ പറയുന്നത്.
ബാക്കിയുള്ള കളിക്കാർ അവരുടെ പരിശീലന സെഷൻ പൂർത്തിയാക്കിയതിനു ശേഷവും വീരാട് കോഹ്ലി ഏകദേശം രണ്ടര മണിക്കൂർ നെറ്റ്സിൽ പരിശീലിക്കുകയായിരുന്നു എന്ന് റാഷിദ് പറഞ്ഞു,
“ഐപിഎൽ സമയത്ത്, ഞങ്ങൾക്ക് അടുത്ത ദിവസം ആർ‌സി‌ബിയ്‌ക്കെതിരെ ഒരു മത്സരം ഉണ്ടായിരുന്നു. സത്യം പറഞ്ഞാൽ, ഞങ്ങളുടെ പരിശീലനം തീർന്നപ്പോഴും അവൻ അവിടെ ബാറ്റ് ചെയ്യുന്നുണ്ടായിരുന്നു. അടുത്ത ദിവസം ഞങ്ങൾക്കെതിരെ ഏകദേശം 70 റൺസ് സ്കോർ ചെയ്തു. അവന്റെ മാനസികാവസ്ഥ വളരെ പോസിറ്റീവാണ്,” റാഷിദ് ഏഷ്യാ കപ്പിന് മുന്നോടിയായി പറഞ്ഞു.
ആർ‌സി‌ബിയ്‌ക്ക് ഇത് തീർച്ചയായും വിജയിക്കേണ്ട ഗെയിമായിരുന്നു, ജി‌ടിയുടെ 169 റൺസ് വിജയലക്ഷ്യം പിന്തുടരുന്നതിനിടയിൽ 54 പന്തിൽ 73 റൺസ് അടിച്ച് കോഹ്ലി ടീമിനെ വിജയിപ്പിച്ചു. അദ്ദേഹത്തിന്റെ രണ്ട് സിക്‌സുകളും റാഷിദ് ഖാനെതിരെയായിരുന്നു എന്നതാണ് രസകരം.
വിരാട് കോഹ്ലി ഫോം ഔട്ട് അല്ലാ എന്നാണ് റാഷിദിന്റെ അഭിപ്രായം. മുൻ ഇന്ത്യൻ നായകൻ അധിക സ്കോർ ചെയ്തിട്ടില്ല എന്നല്ല, പകരം അദ്ദേഹം ടീമിന് ഉപയോഗപ്രദമായ സംഭാവനകൾ നൽകുന്നുണ്ടെന്ന് അദ്ദേഹം ചൂണ്ടിക്കാട്ടി.
”പ്രതീക്ഷകൾ വളരെ കൂടുതലാണ്. ഓരോ മത്സരത്തിലും അവൻ നൂറ് സ്കോർ ചെയ്യണമെന്നാണ് ആളുകൾ ആഗ്രഹിക്കുന്നത്. അവന്റെ ടെസ്റ്റ് മാച്ച് ഇന്നിംഗ്സ് കണ്ടാൽ, നന്നായി ബാറ്റ് ചെയ്തു, പിന്നെ എങ്ങനെയൊക്കെയോ 50, 60, 70 ന് പുറത്തായി. വേറെ വല്ല സാധാരണ ബാറ്ററും ഉണ്ടായിരുന്നെങ്കിൽ ഫോമിലാണെന്ന് എല്ലാവരും പറയുമായിരുന്നു. എന്നാൽ വിരാടിനൊപ്പം സെഞ്ചുറികൾ മാത്രമേ ആവശ്യമുള്ളൂ എന്ന തരത്തിലാണ് പ്രതീക്ഷകൾ,” റാഷിദ് പറഞ്ഞു.
