ഐപിഎല്‍ താരലേലപട്ടികയില്‍ നിന്ന് ഇത്തവണ ഒഴിവാക്കപ്പെട്ട മലയാളി താരം എസ് .ശ്രീശാന്തിന്റെ തകര്‍പ്പന്‍ തിരിച്ചുവരവിനാണിന്ന് വിജയ് ഹസാരെ സാക്ഷിയായത് . കേരളത്തിന്റെ ഉത്തര്‍ പ്രദേശിനെതിരായ വിജയ് ഹസാരെ ട്രോഫിയിലെ മത്സരത്തിലാണ് ശ്രീ പ്രതാപകാലത്തെ അനുസ്മരിക്കുന്ന ബൗളിംഗ് കാഴ്ചവെച്ചത് .നേരത്തെ ടൂർണമെന്റിലെ ആദ്യ മത്സരത്തില്‍ ഒഡീഷക്കെതിരെ താരം രണ്ട് വിക്കറ്റ് വീഴ്ത്തിയിരുന്നു .
ഗോസ്വാമി, അക്ഷ് ദീപ്, ഭുവനേശ്വര്‍ കുമാര്‍ (1), മൊഹസിന്‍ ഖാന്‍ (6), ശിവം ശര്‍മ (7) എന്നിവരായിരുന്നു പേസർ ശ്രീശാന്തിന്റെ ഇരകള്‍. 9.4 ഓവറില്‍ 65 റണ്‍സ് വഴങ്ങിയാണ് മുന്‍ ഇന്ത്യന്‍ താരം
5 വിക്കറ്റ് വീഴ്ത്തിയത് . നീണ്ട 15 വർഷത്തിന് ശേഷമാണ് ശ്രീശാന്ത് List A ക്രിക്കറ്റിൽ 5 വിക്കറ്റ് നേടുന്നത് .
2013 ഐപിൽ സീസണിൽ കളിക്കവെ കോഴ ആരോപണത്തിൽ പെട്ട് അറസ്റ്റിലായ താരം ബിസിസിഐയുടെ വിലക്ക് നേരിട്ടിരുന്നു .ശേഷം നീണ്ട നിയമ പോരാട്ടങ്ങൾക്കൊടുവിലാണ് ശ്രീശാന്തിന് വീണ്ടും ക്രിക്കറ്റ് കളിക്കാൻ അവസരം തെളിഞ്ഞത് .സുപ്രീം കോടതി താരത്തിന്റെ വിലക്ക് ഏഴ് വർഷമായി ചുരുക്കിയിരുന്നു .
ഇക്കഴിഞ്ഞ സയ്യദ് മുഷ്‌താഖ്‌ അലി ട്രോഫി ടൂർണമെന്റിൽ താരം കേരള ടീമിനായി കളിച്ചിരുന്നു .എന്നാൽ പ്രതീക്ഷിച്ച പോലെ പ്രകടനം താരത്തിന്റെ ഭാഗത്തുനിന്നുണ്ടായില്ല .ബൗളിങ്ങിൽ താരം ധാരാളം റൺസ് വഴങ്ങുന്നത് മലയാളി ക്രിക്കറ്റ് പ്രേമികൾക്കിടയിൽ ഏറെ ചർച്ച വിഷയമാവുകയും ചെയ്തു .
എന്നാൽ അടുത്ത സീസൺ ഐപിഎല്ലിൽ ഉറപ്പായും കളിക്കുവാൻ കഴിയും എന്നാണ് ശ്രീശാന്ത് പ്രതികരിച്ചത്.
ഏഴ് വർഷം കാത്തിരുന്നു .ഇനിയും കാത്തിരിക്കുവാൻ താൻ റെഡി എന്നാണ് ശ്രീയുടെ വാക്കുകൾ
