സെയ്ദ് മുഷ്താഖ് അലി ട്രോഫിയില്‍ തുടര്‍ച്ചയായ രണ്ട് പരാജയങ്ങള്‍ക്ക് ശേഷം കേരളം വിജയവഴിയില്‍ തിരിച്ചെത്തി. ജമ്മു കാശ്മീരിനെതിരെയുള്ള മത്സരത്തില്‍ 62 റണ്‍സിന്‍റെ വിജയമാണ് കേരളം നേടിയത്‌. ആദ്യം ബാറ്റ് ചെയ്ത കേരളം നിശ്ചിത 20 ഓവറില്‍ 4 വിക്കറ്റ് നഷ്ടത്തില്‍ 184 റണ്‍സ് നേടി. മറുപടി ബാറ്റിംഗില്‍ ജമ്മു കാശ്മീര്‍ 19 ഓവറില്‍ 122 റണ്‍സില്‍ എല്ലാവരും പുറത്തായി
വിജയലക്ഷ്യം പിന്തുടര്‍ന്ന ജമ്മു കാശ്മീരിനു മികച്ച തുടക്കമാണ് ലഭിച്ചത്. 4 ഓവറില്‍ 42 റണ്‍സാണ് ഓപ്പണര്‍മാര്‍ കൂട്ടിചേര്‍ത്തത്. 14 പന്തില്‍ 30 റണ്‍സ് നേടിയ ശുഭ്മാന്‍ കജോരിയയെ പുറത്താക്കി സിജോമോന്‍ ജോസഫ് കേരളത്തിനു ബ്രേക്ക്ത്രൂ നല്‍കി.
പിന്നീട് ജമ്മു കാശ്മീരിനു തുടര്‍ച്ചയായി വിക്കറ്റുകള്‍ നഷ്ടമായി. കേരളത്തിനായി ബേസില്‍ തമ്പിയും ആസീഫും 3 വിക്കറ്റ് നേടി. വൈശാഖ് 2 വിക്കറ്റ് വീഴ്ത്തിയപ്പോള്‍ സിജോമോന്‍ ജോസഫ്, മിഥുന്‍ എന്നിവര്‍ ഓരോ വിക്കറ്റ് സ്വന്തമാക്കി.
നേരത്തെ ആദ്യം ബാറ്റ് ചെയ്ത കേരളത്തിനായി സച്ചിന്‍ ബേബി 32 പന്തില്‍ 7 ഫോറും 3 സിക്സുമായി 62 റണ്‍സ് നേടി. 56 പന്തില്‍ 6 ഫോറും 1 സിക്സുമായി 61 റണ്‍സ് നേടി സഞ്ചു സാംസണ്‍ മികച്ച പിന്തുണ നല്‍കി. 11 പന്തില്‍ 24 റണ്ണുമായി അബ്ദുള്‍ ബാസിതും ശ്രദ്ദേയ പ്രകടനം നടത്തി.
