കൗണ്ടി ക്രിക്കറ്റിൽ കളിക്കാനൊരുങ്ങിയ ഇന്ത്യൻ പേസർ നവ്ദീപ് സൈനിയെ വരാനിരിക്കുന്ന വെസ്റ്റ് ഇൻഡീസ് പരമ്പരയ്ക്കുള്ള ഇന്ത്യൻ ടെസ്റ്റ് ടീമിലേക്ക് തിരിച്ചുവിളിച്ചു. 2025-ൽ ലോർഡ്‌സിൽ ഫൈനൽ നടക്കാനിരിക്കുന്ന പുതിയ ലോക ടെസ്റ്റ് ചാമ്പ്യൻഷിപ്പിൽ, ഇന്ത്യയുടെ ആദ്യ പോരാട്ടം വെസ്റ്റ് ഇൻഡീസിനെതിരെയാണ്. രണ്ട് ടെസ്റ്റ് മത്സരങ്ങളാണ് പരമ്പരയില്‍ ഉള്ളത്.
വോർസെസ്റ്റർഷെയറുമായി കരാറിലേർപ്പെട്ട സൈനിക്ക് ഇതിനാല്‍ ഇംഗ്ലീഷ് ടീമിനായി മൂന്ന് മത്സരങ്ങൾ നഷ്ടമാകും. വെസ്റ്റ് ഇൻഡീസിലെ ടെസ്റ്റ് പരമ്പരയുടെ ദിവസങ്ങളിലാണ് ഈ മത്സരങ്ങള്‍ നടക്കുക. ജൂലൈ 12 മുതൽ 16 വരെ ഡൊമിനിക്കയിൽ ഇന്ത്യ ആദ്യ ടെസ്റ്റ് കളിക്കും, രണ്ടാമത്തെയും അവസാനത്തെയും മത്സരം ജൂലൈ 20 മുതൽ 24 വരെ ജമൈക്കയിലാണ് ഒരുക്കിയട്ടുള്ളത്.
ഞായറാഴ്ച ഡെർബിഷെയറിനെതിരെ ന്യൂ റോഡിൽ നടക്കുന്ന മത്സരത്തിലാണ് 30 കാരനായ സൈനി വോർസെസ്റ്റർഷയറിനായി അരങ്ങേറ്റം കുറിക്കുന്നത്. ഇന്ത്യന്‍ ടീമില്‍ ഉള്‍പ്പെടുത്തിയെന്ന വാര്‍ത്ത കേട്ടപ്പോള്‍ താന്‍ ആശ്ചര്യപ്പെട്ടു എന്ന് സൈനി പ്രതികരിച്ചു. ഇംഗ്ലണ്ടില്‍ എത്തിയതിനു ശേഷമാണ് താൻ വാർത്തയെക്കുറിച്ച് അറിഞ്ഞതെന്ന് പറഞ്ഞു.
“ഞാനിവിടെ വന്നത് കൗണ്ടി കളിക്കാനാണ്, വിമാനത്താവളത്തിൽ നിന്ന് ഇറങ്ങിയ നിമിഷം, വെസ്റ്റ് ഇൻഡീസ് പര്യടനത്തിന് എന്നെ തിരഞ്ഞെടുത്തുവെന്ന വാർത്ത എനിക്ക് ലഭിച്ചു,”
“സത്യസന്ധമായി, ഇത് ഞാൻ പ്രതീക്ഷിച്ചിരുന്നില്ല. അതെ, ഐ‌പി‌എൽ സമയത്ത്, ഞാൻ ഡ്യൂക്ക്‌സ് പന്തിൽ പരിശീലനം നടത്തുകയായിരുന്നു, കാരണം എന്നെ നെറ്റ് ബൗളറായി തിരഞ്ഞെടുത്തേക്കാം അല്ലെങ്കിൽ ലോക ടെസ്റ്റ് ചാമ്പ്യൻഷിപ്പ് ഫൈനലിനുള്ള സ്റ്റാൻഡ്‌ബൈയിൽ ഉൾപ്പെടുമെന്ന് ഞാൻ കരുതി,” സൈനി പറഞ്ഞു.
“വെസ്റ്റ് ഇൻഡീസിലേക്ക് പോകുന്നതിന് മുമ്പ് എനിക്ക് ഒരു മത്സരം കളിക്കാൻ കഴിയുമെന്ന് പ്രതീക്ഷിക്കുന്നു. എനിക്ക് നല്ല തയ്യാറെടുപ്പ് നടത്താനാവും, ”അദ്ദേഹം കൂട്ടിച്ചേർത്തു.
അവസരം ലഭിച്ചാൽ മികച്ച പ്രകടനം പുറത്തെടുക്കുമെന്ന പ്രതീക്ഷയിലാണ് ഈ ഇന്ത്യന്‍ പേസർ. കഴിഞ്ഞ വിന്‍ഡീസ് പര്യടനത്തില്‍ താരത്തിനെ ഉള്‍പ്പെടുത്തിയെങ്കിലും പ്ലേയിങ്ങ് ഇലവനില്‍ ഉള്‍പ്പെടുത്തിയിരുന്നില്ലാ.
