ഐപിഎൽ മെഗാ ലേലത്തിൽ ചെന്നൈ സൂപ്പർ കിംഗ്സ് തന്നെ വിളിച്ചെടുക്കുമെന്ന് പ്രത്യാശിച്ച് ദീപക് ചാഹർ. കഴിഞ്ഞ കുറച്ച് സീസണുകളായി ചെന്നൈ ടീമിന്‍റെ ഭാഗമാണ് ദീപക്ക് ചഹര്‍. 2022 സീസണില്‍ താരത്തെ നിലനിര്‍ത്തിയില്ലെങ്കിലും ലേലത്തില്‍ 14 കോടി മുടക്കി ടീമില്‍ വീണ്ടും എത്തിച്ചു.
ചെന്നൈ ടീമിനായി ഒരിക്കൽ കൂടി കളിക്കാനുള്ള തൻ്റെ ആഗ്രഹം പ്രകടിപ്പിച്ച ദീപക്ക് ചഹര്‍ പവർപ്ലേ ഓവറുകളിൽ വിക്കറ്റ് വീഴ്ത്താനുള്ള അദ്ദേഹത്തിൻ്റെ കഴിവ് ആധുനിക ഗെയിമിൽ ഒരു വലിയ മുതൽക്കൂട്ടാണെന്ന് പറയുകയും ചെയ്തു.
“കഴിഞ്ഞ മെഗാ ലേലത്തിലും എന്നെ അവർ നിലനിർത്തിയില്ല. പക്ഷേ അവർ വന്‍ തുക മുടക്കി എന്നെ തിരികെ വാങ്ങി. ഈ വർഷം എന്ത് സംഭവിക്കുമെന്ന് എനിക്കറിയില്ല, പക്ഷേ ഇപ്പോൾ എൻ്റെ കഴിവ് കൂടുതൽ വിലമതിക്കുമെന്ന് എനിക്കറിയാം. പവർപ്ലേയിൽ 90-100 റൺസ് സ്‌കോർ ചെയ്യുന്നുണ്ട്, അതുകൊണ്ടാണ് ടീമുകൾ 200-ലധികം സ്‌കോർ ചെയ്യുന്നത്. പവര്‍പ്ലേ ഓവറില്‍ റണ്‍സ് നിയന്ത്രിക്കുന്നതില്‍ ഞാന്‍ എത്രത്തോളം വിലപ്പെട്ടതാണ് എന്ന് തെളിയിച്ചിട്ടുണ്ട്.”
“അവർ എനിക്ക് വേണ്ടി വീണ്ടും ലേലം വിളിക്കുമെന്ന് ഞാൻ കരുതുന്നു. മഞ്ഞ ജേഴ്സി വീണ്ടും ധരിക്കാൻ ഞാൻ ആഗ്രഹിക്കുന്നു, അങ്ങനെയല്ലെങ്കിൽ, രാജസ്ഥാൻ റോയൽസ് എനിക്കായി ലേലം വിളിക്കണമെന്നാണ് എന്‍റെ ആഗ്രഹം,” അദ്ദേഹം കൂട്ടിച്ചേർത്തു.
ക്യാപ്റ്റൻ റുതുരാജ് ഗെയ്‌ക്‌വാദിനെയും രവീന്ദ്ര ജഡേജ, എംഎസ് ധോണി, ശിവം ദുബെ, മതീഷ പതിരാന എന്നിവരെയാണ് ചെന്നൈ സൂപ്പര്‍ കിംഗ്സ് നിലനിര്‍ത്തിയിരിക്കുന്നത്.
