പരിക്കിന്‍റെ പിടിയിലായിരുന്ന ജസ്പ്രീത് ബുംറ തകര്‍പ്പന്‍ തിരിച്ചു വരവാണ് ടീം ഇന്ത്യയിലേക്ക് നടത്തിയത്. ഓസ്ട്രേലിയക്കെതിരെയുള്ള രണ്ടാം ടി20 മത്സരത്തില്‍ 2 ഓവര്‍ എറിഞ്ഞ താരം, ശ്രദ്ധേയമായ പന്തുകള്‍ എറിഞ്ഞിരുന്നു.
ഇപ്പോഴിതാ മത്സരത്തിലെ ബൗളിംഗ് മികവിനെ മുൻ പാകിസ്ഥാൻ ക്രിക്കറ്റ് താരം ഡാനിഷ് കനേരിയ അഭിനന്ദിക്കുകയാണ്. ഓസ്‌ട്രേലിയൻ ക്യാപ്റ്റൻ ആരോൺ ഫിഞ്ചിനെ മികച്ച യോർക്കറുമായി ബുംറ അയച്ചത് എങ്ങനെയെന്ന് അദ്ദേഹം ചൂണ്ടിക്കാട്ടി. ടി20 ലോകകപ്പിൽ ജസ്പ്രീത് ബുംറയ്ക്ക് ബാറ്റർമാരുടെ വിരലുകൾ തകർക്കാൻ കഴിയുമെന്ന് കനേരിയ അഭിപ്രായപ്പെട്ടു.
മത്സരത്തില്‍ ആറ് വിക്കറ്റിന് വിജയിച്ചതിന് ശേഷം തന്റെ യൂട്യൂബ് ചാനലിൽ സംസാരിക്കവെ അദ്ദേഹം പറഞ്ഞു:
“ജസ്പ്രീത് ബുംറ വീണ്ടും ട്രാക്കിലായി. അവൻ മികച്ച താളത്തിൽ കാണുന്നതിനാല്‍ എതിർ ടീമുകൾ സൂക്ഷിക്കണം. വൈഡോടെ തുടങ്ങിയപ്പോൾ അത് 140 കിലോമീറ്ററിന് മുകളിലായിരുന്നു. പിന്നീട് ആരോൺ ഫിഞ്ചിനെ പുറത്താക്കാൻ അദ്ദേഹം ഉജ്ജ്വലമായ യോർക്കർ എറിഞ്ഞു.” കനേരിയ കൂട്ടിച്ചേർത്തു:
” ആ ഡെലിവറിയെ അഭിനന്ദിക്കാതിരിക്കാന്‍ ഫിഞ്ചിന് കഴിഞ്ഞില്ലാ. പരിക്കിന് ശേഷം തിരിച്ചുവരവ് ഒരിക്കലും എളുപ്പമല്ല. സമ്മർദ്ദത്തിൻ കീഴിൽ അദ്ദേഹം മികച്ച സ്പെൽ ബൗൾ ചെയ്തു. ടി20 ലോകകപ്പിൽ അവന്‍ ബാറ്റര്‍മാരുടെ കാൽവിരലുകൾ തകർക്കാൻ പോകുന്നു.”
ഇന്ത്യയും ഓസ്‌ട്രേലിയയും തമ്മിലുള്ള രണ്ടാം മത്സരം നനഞ്ഞ ഔട്ട്‌ഫീൽഡ് കാരണം എട്ട് ഓവർ വീതമായി ചുരുക്കിയിരുന്നു. ബുംറ തന്റെ രണ്ട് ഓവറിൽ മുഴുവൻ ക്വാട്ടയിൽ നിന്ന് 23 റൺസ് വിട്ടുകൊടുത്ത് ഒരു നിർണായക വിക്കറ്റ് വീഴ്ത്തി.
