ആവശ്യമെങ്കിൽ പാക്കിസ്ഥാന്‍ ടീമിന് ഒരേ സമയം രണ്ട് ടീമുകളെ ഇറക്കാൻ കഴിയുന്നത്ര ഓപ്ഷനുകൾ സൃഷ്ടിക്കാന്‍ താൻ ആഗ്രഹിക്കുന്നുവെന്ന് പാകിസ്ഥാൻ സെലക്ഷൻ കമ്മിറ്റിയുടെ ഇടക്കാല ചെയർമാനായ ഷാഹിദ് അഫ്രീദി. പാകിസ്ഥാൻ ക്രിക്കറ്റ് ബോർഡ് ചെയർമാനായി റമീസ് രാജയെ പുറത്താക്കിയതിന് ശേഷമാണ് ഷാഹിദ് അഫ്രീദി ഈ സ്ഥാനത്തേക്ക് എത്തിയത്.
ഒരേ സമയം രണ്ട് വിത്യസ്ത ടീമുകളെ ഇന്ത്യ ഇറക്കിയിരുന്നു. ഇതുപോലെ ടീമുകളെ വിന്യസിച്ച് ബെഞ്ച് ശക്തി വര്‍ദ്ധിപ്പിക്കാനാണ് അഫ്രീദിയുടെ ആഗ്രഹം.
“എന്റെ കാലാവധി അവസാനിക്കുന്നതിന് മുമ്പ് രണ്ട് ടീമുകളെ പാകിസ്ഥാന് വേണ്ടി സൃഷ്ടിക്കാൻ ഞാൻ ആഗ്രഹിക്കുന്നു, ബെഞ്ച് ശക്തി വർദ്ധിപ്പിക്കാൻ ആഗ്രഹിക്കുന്നു,” അഫ്രീദി മാധ്യമങ്ങളോട് പറഞ്ഞു. ഷഹീൻ അഫ്രീദിയുടെയും നസീം ഷായുടെയും അഭാവത്തിൽ പാകിസ്ഥാൻ പേസർമാർക്ക് അവരുടെ സമീപകാല ടെസ്റ്റ് മത്സരങ്ങളിൽ മികച്ച പ്രകടനം നടത്താൻ കഴിയാതെ വന്നതിന് പിന്നാലെയാണ് അഫ്രീദിയുടെ പ്രസ്താവന.
ന്യൂസിലൻഡിനെതിരായ ആദ്യ ടെസ്റ്റിന്റെ അവസാന ദിനത്തിൽ ടീയിൽ 135 റൺസിന് മുകളിൽ മാത്രം ലീഡ് നേടി പാകിസ്ഥാൻ ഇന്നിംഗ്‌സ് ഡിക്ലയർ ചെയ്യാനുള്ള ബാബർ അസമിന്റെ തീരുമാനത്തെയും അഫ്രീദി ന്യായീകരിച്ചു. 7.3 ഓവറില്‍ 61 റണ്‍സ് നേടി ന്യൂസിലന്‍റ് വിജയത്തിനായി പൊരുതിയപ്പോള്‍ വെളിച്ചക്കുറവ് കാരണം മത്സരം നിര്‍ത്തിയതിനാല്‍ പാക്കിസ്ഥാന്‍ രക്ഷപ്പെടുകയായിരുന്നു.
“പാക് ടീമിന്റെ നട്ടെല്ലാണ് ബാബർ അസം, ഞങ്ങൾ അദ്ദേഹത്തെ പിന്തുണയ്ക്കും. ഡിക്ലെയര്‍ ചെയ്യാന്‍ സംബന്ധിച്ച അദ്ദേഹത്തിന്റെ തീരുമാനം നല്ലതായിരുന്നു, ”അഫ്രീദി പറഞ്ഞു. സെലക്ടർമാരും കളിക്കാരും തമ്മിൽ വ്യക്തമായ ആശയവിനിമയം നടത്താനാണ് താൻ ശ്രമിക്കുന്നതെന്നും അഫ്രീദി കൂട്ടിചേര്‍ത്തു.
“പണ്ട് ആശയവിനിമയത്തിന്റെ അഭാവം ഉണ്ടായിരുന്നതായി എനിക്ക് തോന്നുന്നു. കളിക്കാരോട് വ്യക്തിപരമായി സംസാരിച്ച് അവരുടെ പ്രശ്നങ്ങൾ ഞാൻ മനസ്സിലാക്കി. ഹാരിസ് സൊഹൈൽ, ഫഖർ സമാൻ എന്നിവരുമായി ഞാൻ നേരിട്ട് സംസാരിച്ചു അവരുടെ ടെസ്റ്റുകൾ നടത്തി. കളിക്കാരും സെലക്ഷൻ കമ്മിറ്റിയും തമ്മിൽ നേരിട്ട് ആശയവിനിമയം നടത്തണമെന്നാണ് ഞാൻ വിശ്വസിക്കുന്നത് ” അഫ്രീദി പറഞ്ഞു നിര്‍ത്തി.
