വുമണ്‍സ് പ്രീമിയര്‍ ലീഗില്‍ മുംബൈക്കെതിരെ 29 റണ്‍സിന്‍റെ വിജയവുമായി ഡല്‍ഹി ക്യാപിറ്റല്‍സ്. ഡല്‍ഹി ഉയര്‍ത്തിയ 193 റണ്‍സ് വിജയലക്ഷ്യം പിന്തുടര്‍ന്ന മുംബൈ ഇന്ത്യന്‍സിന് നിശ്ചിത 20 ഓവറില്‍ 8 വിക്കറ്റ് നഷ്ടത്തില്‍ 163 ല്‍ എത്താനാണ് കഴിഞ്ഞത്.
മുംബൈ ഇന്ത്യന്‍സ് തോല്‍വി നേരിട്ടെങ്കിലും മലയാളി താരം സജന സജീവന്‍ ശ്രദ്ദേയ പ്രകടനം നടത്തി. 14 പന്തില്‍ 3 ഫോറും 1 സിക്സുമായി 24 റണ്‍സ് നേടി പുറത്താകതെ നിന്നു.
അരുന്ധതി റെഡ്ഡിയുടെ 19ാം ഓവറിലാണ് സജനയുടെ എല്ലാ ബൗണ്ടറിയും പിറന്നത്. ഉദ്ഘാടന മത്സരത്തില്‍ മുംബൈ ഇന്ത്യന്‍സിനു വിജയിക്കാന്‍ അവസാന പന്തില്‍ 5 റണ്‍സ് വേണമെന്നിരിക്കെ സജന സിക്സടിച്ച് ഫിനിഷ് ചെയ്തിരുന്നു.
മുംബൈ നിരയില്‍ അമന്‍ജോത്ത് കൗര്‍ 42 റണ്‍സുമായി ടോപ്പ് സ്കോററായി. നേരത്തെ ആദ്യം ബാറ്റ് ചെയ്ത ഡല്‍ഹിക്കായി ജെമീമ റോഡ്രിഗസാണ് 33 പന്തില്‍ 8 ഫോറും 3 സിക്സുമായി 69 റണ്‍സ് നേടി ഡല്‍ഹിയെ കൂറ്റന്‍ സ്കോറിലേക്ക് നയിച്ചത്. 38 പന്തില്‍ 53 റണ്‍സ് നേടി മെഗ് ലാനിംഗും തകര്‍പ്പന്‍ പ്രകടനം കാഴ്ച്ചവച്ചു.
