2021 ഐസിസി പുരുഷ ടി20 ലോകകപ്പ് ഗ്രൂപ്പ് ഘട്ട മത്സരത്തിന് ശേഷം ആദ്യമായി, ഈ മാസം ആഗസ്റ്റ് 28 ന് ഇന്ത്യ പാകിസ്ഥാനെ നേരിടും. ഏഷ്യാ കപ്പ് ടൂര്‍ണമെന്‍റിലാണ് ഇരു ടീമും ഏറ്റു മുട്ടുക. കഴിഞ്ഞ വർഷം, വിരാട് കോഹ്‌ലിയുടെ നേതൃത്വത്തിലുള്ള ഇന്ത്യന്‍ ടീമിനെ 10 വിക്കറ്റിന് തകർത്തപ്പോൾ ലോകകപ്പ് മത്സരങ്ങളിൽ ഇന്ത്യയ്‌ക്കെതിരെ പാകിസ്ഥാൻ ആദ്യ ജയം ഉറപ്പിച്ചു.
ബാബർ അസമിന്റെ നേതൃത്വത്തിലുള്ള പാക്കിസ്ഥാന് ടി20 ടീം മികച്ചതാണ്. അതിനാൽ ഈ ബദ്ധവൈരികൾ ഒരിക്കൽ കൂടി പരസ്പരം ഏറ്റുമുട്ടുമ്പോൾ തകര്‍പ്പന്‍ പോരാട്ടമാണ് ആരാധകര്‍ പ്രതീക്ഷിക്കുന്നത്. മത്സരം ആരംഭിക്കാന്‍ ദിവസങ്ങള്‍ ബാക്കി നില്‍ക്കേ ഇത്തവണ പാക്കിസ്ഥാന് ഇന്ത്യക്കെതിരെ വിജയിക്കുമെന്ന് പറയുകയാണ് മുൻ പാകിസ്ഥാൻ ക്യാപ്റ്റൻ റാഷിദ് ലത്തീഫ്
കഴിഞ്ഞ വർഷത്തെ ടി20 ലോകകപ്പിൽ പാക്കിസ്ഥാനെതിരായ നാണംകെട്ട തോൽവിക്ക് ശേഷം, രോഹിത് ശർമ്മയുടെ ക്യാപ്റ്റൻസിയിൽ ഇന്ത്യ ടി20 ഫോര്‍മാറ്റില്‍ തങ്ങളുടെ കളിശൈലിയിൽ കാര്യമായ മാറ്റങ്ങൾ വരുത്തിയതായി മുൻ വിക്കറ്റ് കീപ്പർ-ബാറ്റർ പറഞ്ഞു; ദുബായിൽ നടക്കുന്ന ഏഷ്യാ കപ്പ് പോരാട്ടത്തിൽ മെൻ ഇൻ ബ്ലൂ ടീമിനെ നേരിടുമ്പോൾ പാക്കിസ്ഥാന് ടീമിനു മുൻതൂക്കം ലഭിക്കുമെന്നാണ് അദ്ദേഹം വിശ്വസിക്കുന്നത്.
രോഹിത് ശർമ്മ, കെ എൽ രാഹുൽ, വിരാട് കോഹ്‌ലി എന്നിവരുടെ മത്സരങ്ങളിലെ അസാന്നിധ്യവും ക്യാപ്റ്റൻസിയിലെ ഇന്ത്യയുടെ തുടർച്ചയായ മാറ്റങ്ങളും പാകിസ്ഥാനെതിരെ തോല്‍ക്കാന്‍ കാരണമാകും എന്ന് ലത്തീഫ് വിശദീകരിച്ചു
“ജയവും തോൽവിയും വ്യത്യസ്തമാണ്. എന്നാൽ പാകിസ്ഥാന്റെ തന്ത്രം കൂടുതൽ മെച്ചമാണെന്ന് ഞാൻ കരുതുന്നു. പാകിസ്ഥാൻ ടീമിൽ കാര്യമായ മാറ്റങ്ങളൊന്നുമില്ല, അത് ടി20യിലായാലും ഏകദിനത്തിലായാലും ടെസ്റ്റിലായാലും. ഇന്ത്യയെ നോക്കുമ്പോൾ അവർക്ക് ഈ വര്‍ഷം 7 ക്യാപ്റ്റന്മാരുണ്ടായിരുന്നു, നിലവിലെ സാഹചര്യത്തിൽ ഇത് തികച്ചും അനുചിതമാണ്, ”ലത്തീഫ് തന്റെ യൂട്യൂബ് ചാനലിൽ പറഞ്ഞു.
“കോഹ്‌ലി ഇല്ല. രോഹിതിനും രാഹുലിനും പരിക്കേറ്റു. ഹാർദിക് പാണ്ഡ്യയും ഋഷഭ് പന്തും ക്യാപ്റ്റൻമാരായി വന്നു. ശിഖർ ധവാനും (ഏകദിനം) ക്യാപ്റ്റനായി വന്നു. അവരുടെ മികച്ച ടീമിനെ ഉണ്ടാക്കുന്നതിൽ അവർക്ക് കുറച്ച് ബുദ്ധിമുട്ടുണ്ടാകും. ഇന്ത്യക്ക് മികച്ച കളിക്കാർ ഉണ്ടെന്നതിൽ സംശയമില്ല. പക്ഷേ അവർക്ക് അവരുടെ ഏറ്റവും മികച്ച സ്ക്വാഡ് ആക്കാനാകില്ല, അവരുടെ മികച്ച ഇലവനെ രൂപീകരിക്കുന്നതിൽ പോലും അവർക്ക് പ്രശ്‌നങ്ങളുണ്ടാകുമെന്ന് ഞാൻ കരുതുന്നു,” അദ്ദേഹം കൂട്ടിച്ചേർത്തു.
അദ്ദേഹത്തിന്റെ അഭിപ്രായത്തിൽ, 2021 ലെ ടി20 ലോകകപ്പിൽ പാകിസ്ഥാൻ ഇന്ത്യയെക്കാൾ മികച്ച നേട്ടം കൈവരിച്ചത് ഇന്ത്യയുടെ പിഴവുകൾ കാരണമാണ്. ”കഴിഞ്ഞ വർഷം ഇന്ത്യയുടെ പിഴവുകൾ കൊണ്ടാണ് പാകിസ്ഥാൻ വിജയിച്ചത്, ഇത്തവണയും ഇന്ത്യയുടെ പിഴവുകൾ പാക്കിസ്ഥാന് ഗുണം ചെയ്യുമെന്ന് കരുതുന്നു ” ലത്തീഫ് പറഞ്ഞു.
