പഞ്ചാബ് കിംഗ്സിനെതിരെ റോയല്‍ ചലഞ്ചേഴ്സ് ബാംഗ്ലൂര്‍ 4 വിക്കറ്റിന്‍റെ വിജയം സ്വന്തമാക്കിയപ്പോള്‍ പ്ലെയര്‍ ഓഫ് ദ മാച്ചായി തിരഞ്ഞെടുക്കപ്പെട്ടത് വിരാട് കോഹ്ലിയായിരുന്നു. മത്സരത്തില്‍ 49 പന്തില്‍ 77 റണ്‍സാണ് വിരാട് കോഹ്ലി നേടിയത്.
11 ഫോറിന്‍റെയും 2 സിക്സിന്‍റേയും അകമ്പടിയോടെയാണ് വിരാടിന്‍റെ ഈ ഇന്നിംഗ്സ്. ആദ്യ ഓവറില്‍ വിരാട് കോഹ്ലിയുടെ ക്യാച്ചിന് വലിയ വിലയാണ് പഞ്ചാബ് നല്‍കിയത്.
മത്സരത്തിനു ശേഷം 2024 ടി20 ലോകകപ്പില്‍ താന്‍ ഉണ്ടാകും എന്ന വലിയൊരു സൂചനയും മുന്‍ ബാംഗ്ലൂര്‍ ക്യാപ്റ്റന്‍ നല്‍കി. ” ലോകത്ത് ടി20 ക്രിക്കറ്റ് പ്രൊമോട്ട് ചെയ്യാനായി എന്‍റെ പേര് പലപ്പോഴും ഉപയോഗിക്കാറുണ്ട്. ഈ ഫോര്‍മാറ്റില്‍ ഇനിയും എനിക്ക് ബാക്കിയുണ്ടെന്നാണ് ഞാന്‍ കരുതുന്നത്. ” മത്സര ശേഷം വിരാട് കോഹ്ലി പറഞ്ഞു.
ഐപിഎല്ലിനു ശേഷം ജൂണ്‍ 1 നാണ് ടി20 ലോകകപ്പ് ആരംഭിക്കുന്നത്. വിരാട് കോഹ്ലിയുടെ ശൈലി ടി20 ലോകകപ്പിനു പറ്റിയതല്ലാ എന്നും അതിനാല്‍ സ്ക്വാഡില്‍ ഉള്‍പ്പെടുത്തില്ലാ എന്നും റിപ്പോര്‍ട്ടുകള്‍ ഉണ്ടായിരുന്നു. ഇപ്പോഴിതാ ടി20 ഫോര്‍മാറ്റില്‍ തനിക്ക് നന്നായി ചെയ്യാന്‍ കഴിയും എന്ന് പറഞ്ഞ് എത്തിയിരിക്കുകയാണ് വിരാട് കോഹ്ലി
