അവസാന ഓവർ ത്രില്ലറിൽ പാകിസ്ഥാൻ അഫ്ഗാനിസ്ഥാനെ തോൽപ്പിച്ചതോടെ 2022 ലെ ഏഷ്യാ കപ്പിൽ നിന്ന് ഇന്ത്യ പുറത്തായി. സൂപ്പർ 4 ഘട്ടത്തിൽ പാക്കിസ്ഥാനോടും ശ്രീലങ്കയോടും ഇന്ത്യ തോറ്റിരുന്നു. അവസാന സൂപ്പര്‍ ഫോര്‍ പോരാട്ടത്തില്‍ ഇന്ത്യ അഫ്ഗാനെ നേരിടാന്‍ ഒരുങ്ങുകയാണ്. അഫ്ഗാനിസ്ഥാനെ തോൽപ്പിച്ച് ടൂർണമെന്‍റ് വിജയത്തോടെ അവസാനിപ്പിക്കാനാണ് ഇന്ത്യയുടെ ശ്രമം.
അസുഖത്തെ തുടർന്ന് ആവേശ് ഖാൻ ടൂർണമെന്റിൽ നിന്ന് പുറത്തായതോടെ പകരക്കാരനായി ടീമിലെത്തിയ ദീപക്ക് ചഹറിന് അവസരം ലഭിച്ചേക്കും. പാക്കിസ്ഥാനെതിരെ മികച്ച പ്രകടനം നടത്തിയ രവി ബിഷ്‌ണോയിയെ ടീമിലെത്തിക്കാൻ സാധ്യതയുണ്ട്. ടീമിന്‍റെ ബാലന്‍സ് സൃഷ്ടിക്കാനായി അക്സര്‍ പട്ടേലിനെ ഉള്‍പ്പെടുത്തുമ്പോള്‍ റിഷഭ് പന്തിനു സ്ഥാനം നഷ്ടമാകും.
ദീപക് ഹൂഡയ്ക്ക് പകരം ദിനേശ് കാർത്തിക്കിനെ ടീമിലെത്തിക്കുന്നതാകും ടീമിലെ മറ്റൊരു മാറ്റം. ടീമിനായി ഫിനിഷറുടെ റോൾ നിർവഹിക്കാൻ ഹൂഡയ്ക്ക് കഴിഞ്ഞില്ല, കഴിഞ്ഞ രണ്ട് മത്സരങ്ങളിൽ താരം നിരാശപ്പെടുത്തിയപ്പോള്‍ കാര്‍ത്തികിനു അവസരം ലഭിക്കും.
പവർപ്ലേയിലും മിഡിൽ ഓവറിലും ഇന്ത്യ മികച്ച പ്രകടനമാണ് നടത്തിയത്. ഡെത്ത് ഓവറുകളാണ് ബാറ്റിലും പന്തിലും ഇന്ത്യയുടെ പ്രകടനത്തെ തടസ്സപ്പെടുത്തിയത്. അവസാന ഓവറുകളിൽ, ബൗണ്ടറികൾ അടിക്കാൻ ശ്രമിക്കുന്നതിനിടയിൽ ബാറ്റര്‍മാര്‍ കഷ്ടപ്പെട്ടപ്പോള്‍ ഡെത്ത് ഓവറുകളിൽ ഇന്ത്യയുടെ ബൗളിംഗ് ദയനീയമായി.
റണ്ണൊഴുക്ക് തടയാൻ യോർക്കറുകളും ഡോട്ട് ബോളുകളും എറിയാന്‍ അർഷ്ദീപ് സിംഗിന് മാത്രമേ കഴിഞ്ഞിട്ടുള്ളൂ. മറ്റ് പേസർമാരായ ഹാർദിക് പാണ്ഡ്യയും ഭുവനേശ്വർ കുമാറും ധാരാളമായി റൺസ് വഴങ്ങി, പ്രതിസന്ധി ഘട്ടങ്ങളിൽ ശരിയായ പന്തുകൾ എക്സിക്യൂട്ട് ചെയ്തില്ല. ഇവയ്ക്കെല്ലാം പരിഹാരം കണ്ടെത്താനാണ് ഇന്ത്യ ഇറങ്ങുക.
ഇരു ടീമും ടൂര്‍ണമെന്‍റില്‍ നിന്നും പുറത്തായതിനാല്‍ ഇത് ഒരു സൗഹൃദ മത്സരം മാത്രമായി അവശേഷിക്കും. മത്സരം ഇന്ത്യന്‍ സമയം രാത്രി 7: 30 ക്കാണ് മത്സരം ആരംഭിക്കുന്നത്. തത്സമയം സ്റ്റാര്‍ സ്പോര്‍ട്ട്സില്‍ കാണാം
