മൊഹാലിയിലെ ഐഎസ് ബിന്ദ്ര ക്രിക്കറ്റ് സ്റ്റേഡിയത്തിൽ നടന്ന മൂന്ന് മത്സരങ്ങളുടെ പരമ്പരയിലെ ആദ്യ ടി20യിൽ 209 റൺസ് വിജയലക്ഷ്യം വെച്ചെങ്കിലും ഇന്ത്യക്കെതിരെ ഓസ്ട്രേലിയ വിജയം നേടിയിരുന്നു. ഭുവനേശ്വർ കുമാർ (0/52), ഹർഷൽ പട്ടേൽ (0/49), യുസ്‌വേന്ദ്ര ചാഹൽ (1/42) എന്നിവരുൾപ്പെടെയുള്ള ഇന്ത്യൻ ബൗളർമാരെ ഓസ്ട്രേലിയ അനായാസം നേരിട്ടു.
മത്സരം വിശകലനം ചെയ്ത മുന്‍ ഇന്ത്യന്‍ താരം ആർപി സിംഗ് ഇന്ത്യൻ ബൗളർമാർ തങ്ങളുടെ പദ്ധതികൾ നടപ്പിലാക്കുന്നതിൽ പരാജയപ്പെട്ടുവെന്ന് പറഞ്ഞു.
“ടി20 ലോകകപ്പിന് മുമ്പുള്ള നല്ല സൂചനകളല്ല ഇത്. ഏഷ്യാ കപ്പിൽ ഞങ്ങൾക്ക് മികച്ച പ്രകടനം കാഴ്ചവെക്കാനാകാത്തപ്പോൾ, ഞങ്ങൾക്ക് ഹർഷൽ പട്ടേലും ജസ്പ്രീത് ബുംറയും ഇല്ലാത്തത് കൊണ്ടാണെന്ന് ഞങ്ങൾ കരുതി. ഈ മത്സരത്തില്‍ ഹർഷൽ പട്ടേലും ടീമിൽ ഉണ്ടായിരുന്നു. പക്ഷേ ഇപ്പോഴും തോൽവിയിലാണ് അവസാനിച്ചത്. അടുത്ത രണ്ട് ഗെയിമുകൾക്കായി ജസ്പ്രീത് ബുംറ മടങ്ങിയെത്തിയാലും അദ്ദേഹത്തിനെതിരെ ബൗണ്ടറികള്‍ അടിക്കാനും സാധ്യതയുണ്ട് ” ആര്‍ പി സിംഗ് Cricbuzz-ൽ പറഞ്ഞു.
“അതിനാൽ, നമ്മുടെ സ്റ്റാർ താരങ്ങള്‍ പരിക്കിൽ നിന്ന് മടങ്ങിയെത്തി ഗെയിമുകൾ ജയിക്കുമെന്ന് ഞങ്ങൾ പ്രതീക്ഷിക്കേണ്ടതില്ല. ലോകകപ്പ് അടുക്കുന്തോറും ഇന്ത്യൻ ടീമിന്റെ പ്രകടനം കുറയുകയാണ് ” മുന്‍ ഇന്ത്യന്‍ താരം കൂട്ടിചേര്‍ത്തു.
പരമ്പരയിൽ ഓസ്ട്രേലിയ 1-0ന് മുന്നിലാണ്. രണ്ടാം ടി20 മത്സരം സെപ്തംബർ 23 വെള്ളിയാഴ്ച നാഗ്പൂരിലെ വിസിഎ സ്റ്റേഡിയത്തിലാണ്.
