ഏഷ്യാ കപ്പ് ടൂര്‍ണമെന്‍റിനൊരുങ്ങുന്ന പാക്കിസ്ഥാന് വീണ്ടും തിരിച്ചടി. കാൽമുട്ടിനേറ്റ പരിക്ക് മൂലം പേസർ ഷഹീൻ ഷാ അഫ്രീദിയെ നഷ്ടപ്പെട്ട് ദിവസങ്ങൾക്ക് ശേഷം, പേസർ മുഹമ്മദ് വസീം ജൂനിയറും പരിക്കേറ്റ് ടൂര്‍ണമെന്‍റില്‍ നിന്നും പുറത്തായി. ബുധനാഴ്ച പാകിസ്ഥാന്റെ പരിശീലന സെഷനിൽ ബൗൾ ചെയ്യുന്നതിനിടെയുണ്ടായ സൈഡ് സ്‌ട്രെയിനെ തുടർന്നാണ് ടൂർണമെന്റിൽ നിന്ന് പുറത്തായത്. പരിക്കേറ്റ വസീമിന് പകരക്കാരനെ പാകിസ്ഥാൻ പ്രഖ്യാപിച്ചു.
എംആർഐ സ്കാനിലാണ് താരത്തിന്‍റെ പരിക്ക് സ്ഥിരീകരിച്ചത്. വസീമിന്റെ പകരക്കാരനായി ഹസൻ അലിയെയാണ് തിരഞ്ഞെടുത്തു, ഇത് ഇപ്പോൾ ഇവന്റ് ടെക്നിക്കൽ കമ്മിറ്റിയുടെ അംഗീകാരത്തിന് വിധേയമാണ്. അനുമതി ലഭിച്ചാലുടൻ, ഓഗസ്റ്റ് 30 ന് ആരംഭിക്കുന്ന ദേശീയ ടി 20 യ്ക്ക് തയ്യാറെടുക്കുന്ന ഹസൻ അലി യുഎഇയിലേക്ക് പോകും, പക്ഷേ ഞായറാഴ്ച ദുബായ് ഇന്റർനാഷണലിൽ നടക്കുന്ന ഇന്ത്യക്കെതിരായ മത്സരം താരത്തിനു നഷ്ടമാകും. 2017 ല്‍ പാക്കിസ്ഥാന് ചാംപ്യന്‍സ് ട്രോഫി നേടിയപ്പോള്‍ പ്ലെയര്‍ ഓഫ് ദ സീരീസ് ഹസന്‍ അലിയായിരുന്നു
നേരത്തെ, ഷഹീന്റെ കാൽമുട്ടിന് പരിക്കേറ്റതിനെത്തുടർന്ന് പാകിസ്ഥാന് വൻ തിരിച്ചടി നേരിട്ടിരുന്നു, 4-6 ആഴ്ചത്തേക്കാണ് അദ്ദേഹത്തിനു മത്സരങ്ങള്‍ നഷ്ടമാവുക. നിലവിൽ യുഎഇയിൽ പാകിസ്ഥാൻ ടീമിനൊപ്പമുള്ള അദ്ദേഹം ഒക്ടോബറിൽ നടക്കുന്ന ടി20 ലോകകപ്പിന് മുമ്പ് ഫിറ്റ്നസ് വീണ്ടെടുക്കുമെന്നാണ് പ്രതീക്ഷിക്കുന്നത്. മുഹമ്മദ് ഹസ്‌നൈനെയാണ് പകരക്കാരനായി തിരഞ്ഞെടുത്തത്.
