റിഷഭ് പന്തിനെ മറികടന്നു, ജിതേഷിനെ ഇല്ലാതാക്കി. സഞ്ജു ലോകകപ്പ് പ്രയാണത്തിൽ. അവിസ്മരണീയ പ്രകടനങ്ങൾ.

ബാംഗ്ലൂരിനെതിരായ ഐപിഎൽ മത്സരത്തിൽ ഒരു തകർപ്പൻ അർത്ഥ സെഞ്ച്വറി നേടി പ്രശംസകൾ ഏറ്റുവാങ്ങിയിരിക്കുകയാണ് മലയാളി താരം സഞ്ജു സാംസൺ. രാജസ്ഥാൻ റോയൽസിന്റെ ഐപിഎല്ലിലെ തുടർച്ചയായ നാലാം വിജയമാണ് സഞ്ജുവിന്റെ ഈ മികച്ച പ്രകടനത്തോടെ പിറന്നത്.

മത്സരത്തിൽ 6 വിക്കറ്റുകളുടെ വിജയമാണ് രാജസ്ഥാൻ നേടിയത്. സഞ്ജു 42 പന്തുകളിൽ 69 റൺസാണ് മത്സരത്തിൽ നേടിയത്. 8 ബൗണ്ടറികളും 2 സിക്സറുകളുമാണ് സഞ്ജുവിന്റെ ഈ കിടിലൻ ഇന്നിങ്സിൽ ഉൾപ്പെട്ടത്. ട്വന്റി20 ലോകകപ്പിലേക്കുള്ള ഇന്ത്യൻ വിക്കറ്റ് കീപ്പർമാരുടെ റൈസിൽ മുന്നിലെത്താൻ സഞ്ജു സാംസണ് സാധിച്ചിട്ടുണ്ട്.

ഇന്ത്യയുടെ മറ്റൊരു വിക്കറ്റ് കീപ്പറായ പന്തിനെ ഓവർടേക്ക് ചെയ്താണ് ഇപ്പോൾ സഞ്ജു ഐപിഎല്ലിൽ മികവ് പുലർത്തിരിക്കുന്നത്. ഇന്ത്യൻ വിക്കറ്റ് കീപ്പർമാരിൽ ഏറ്റവുമധികം റൺസ് ഈ ഐപിഎല്ലിൽ സ്വന്തമാക്കിയ താരമായി സഞ്ജു സാംസൺ മാറിയിട്ടുണ്ട്. ഐപിഎല്ലിലെ മുഴുവൻ വിക്കറ്റ് കീപ്പർമാരെ എടുത്താലും ഈ എഡിഷനിൽ ഏറ്റവുമധികം റൺസ് സ്വന്തമാക്കിയ താരം സഞ്ജു തന്നെയാണ്.

ഇതുവരെ 4 മത്സരങ്ങൾ ഈ ഐപിഎല്ലിൽ കളിച്ച സഞ്ജു 59 എന്ന വലിയ ശരാശരിയോടെ 178 റൺസ് സ്വന്തമാക്കിയിട്ടുണ്ട്. ദക്ഷിണാഫ്രിക്കൻ വിക്കറ്റ് കീപ്പർ ഹെൻറിച്ച് ക്ലാസനെ പിന്തള്ളിയാണ് സഞ്ജു ഒന്നാം സ്ഥാനത്ത് എത്തിയത്. ഇതുവരെ 177 റൺസാണ് ക്ലാസൻ ഈ ഐപിഎല്ലിൽ നേടിയിട്ടുള്ളത്.

ഇതുവരെ 4 ഇന്നിങ്സുകൾ ഈ ഐപിഎല്ലിൽ കളിച്ച സഞ്ജു 2 അർത്ഥ സെഞ്ച്വറികളാണ് നേടിയിട്ടുള്ളത്. ലക്നൗവിനെതിരായ തന്റെ ആദ്യ മത്സരത്തിൽ പുറത്താവാതെ സഞ്ജു 82 റൺസ് സ്വന്തമാക്കിയിരുന്നു. ലോകകപ്പിനുള്ള ഇന്ത്യൻ വിക്കറ്റ് കീപ്പർമാരുടെ ലിസ്റ്റിൽ രണ്ടാം സ്ഥാനത്തുള്ളത് റിഷഭ് പന്താണ്.

ഇതുവരെ 4 ഇന്നിങ്സുകൾ കളിച്ച പന്തും രണ്ട് അർത്ഥസെഞ്ച്വറികൾ നേടി കഴിഞ്ഞു. 152 റൺസാണ് 4 ഇന്നിംഗ്സുകളിൽ നിന്ന് പന്ത് നേടിയത്. പന്തിന് പിന്നിലായി മൂന്നാം സ്ഥാനത്തുള്ളത് ലക്നൗ ടീമിന്റെ നായകൻ കെ എൽ രാഹുലാണ്. 3 മത്സരങ്ങൾ കളിച്ച രാഹുൽ ഇതുവരെ 93 റൺസാണ് നേടിയിട്ടുള്ളത്. 31 എന്ന ശരാശരിയാണ് രാഹുലിനുള്ളത്.

ഈ മൂന്ന് ഇന്ത്യൻ വിക്കറ്റ് കീപ്പർമാരെ മാറ്റി നിർത്തിയാൽ മറ്റുള്ളവർ ആരുംതന്നെ മികച്ച പ്രകടനം പുറത്തെടുത്തിട്ടില്ല. ലോകകപ്പിൽ ഇന്ത്യ വലിയ രീതിയിൽ പരിഗണിച്ചിരുന്ന താരം ജിതേഷ് ശർമയാണ്. എന്നാൽ ഈ ഐപിഎല്ലിൽ ഇതുവരെ ഫ്ലോപ്പ് പ്രകടനമാണ് ജിതേഷ് കാഴ്ച വെച്ചിട്ടുള്ളത്. ഇഷാൻ കിഷൻ, ധ്രുവ് ജൂറൽ എന്നിവരും തങ്ങൾക്ക് ലഭിച്ച അവസരം നന്നായി വിനിയോഗിച്ചിട്ടില്ല. അതിനാൽ തന്നെ വരാനിരിക്കുന്ന ട്വന്റി20 ലോകകപ്പിലേക്കുള്ള സഞ്ജു സാംസന്റെ സാധ്യതകൾ ഈ പ്രകടനങ്ങളോടെ വർദ്ധിച്ചിരിക്കുകയാണ്.