2022 ഐപിഎല്ലില്‍ തന്റെ സ്പീഡ് മികവിനാല്‍ ഉമ്രാന്‍ മാലിക്ക് എല്ലാവരെയും വിസ്മയിച്ചിരുന്നു. തുടര്‍ച്ചയായി 150 കി.മീ സ്പീഡ് കണ്ടെത്തിയ താരം ടൂര്‍ണമെന്‍റില്‍ 20 ലധികം വിക്കറ്റ് വീഴ്ത്തി. ഐപിഎല്ലിലെ തകര്‍പ്പന്‍ പ്രകടനം സൗത്താഫ്രിക്കന്‍ പരമ്പരക്കുള്ള ടീമില്‍ ഇടം നേടി കൊടുത്തു. തന്റെ കരിയർ ഗ്രാഫ് ഇതുപോലെ ഉയരുമെന്ന് ഉമ്രാൻ തന്നെ പ്രതീക്ഷിച്ചിരുന്നില്ലെങ്കിലും, സൺറൈസേഴ്‌സ് ഹൈദരാബാദിലെ അദ്ദേഹത്തിന്റെ പരിശീലകൻ ഡെയ്ൽ സ്റ്റെയ്ന് തീർച്ചയായും ഉണ്ടായിരുന്നു.
ഐപിഎല്‍ തുടങ്ങുന്നതിനു മുന്‍പേ, താന്‍ ഇന്ത്യന്‍ ടീമില്‍ എത്തുമെന്ന് ഡെയില്‍ സ്റ്റെയ്ന് പറഞ്ഞതായി ഉമ്രാന്‍ മാലിക്ക് വെളിപ്പെടുത്തി. ബിസിസിഐ പുറത്തിറക്കിയ വീഡിയോയിലാണ് ഇക്കാര്യം ഉമ്രാന്‍ മാലിക്ക് പറഞ്ഞത്.
” ഞാൻ ഇന്ത്യന്‍ സ്ക്വാഡിലേക്ക് തിരഞ്ഞെടുക്കപ്പെട്ടപ്പോൾ, ടീം ബസിൽ ഡെയ്ൽ സാർ (സ്റ്റെയ്ൻ) എന്നോടൊപ്പം ഉണ്ടായിരുന്നു. ഞങ്ങൾ മത്സരത്തിന് പോകുകയായിരുന്നു. എല്ലാവരും എന്നെ അഭിനന്ദിച്ചു, ഡെയ്ൽ സാർ പറഞ്ഞു, ‘ഐ‌പി‌എല്ലിന് മുമ്പ് ഞാൻ നിന്നോട് പറഞ്ഞിരുന്നു, സീസൺ കഴിഞ്ഞ് നിങ്ങൾക്ക് ടീമിലേക്ക് വിളിക്കുമെന്ന്’. ദൈവാനുഗ്രഹത്താൽ അതുതന്നെ സംഭവിച്ചു. ഇപ്പോൾ ടീം ഇന്ത്യക്ക് വേണ്ടി എന്റെ ഏറ്റവും മികച്ചത് നൽകുക എന്നതാണ് എന്റെ ലക്ഷ്യം ” ജമ്മു എക്സ്പ്രസ്സ് പറഞ്ഞു.
“രാഹുൽ ദ്രാവിഡ് സാറിനെ കാണാനും സംസാരിക്കാനും കഴിഞ്ഞതിൽ ഞാൻ വളരെ സന്തോഷവാനാണ്. അദ്ദേഹം ഒരു ഇതിഹാസമാണ്. ഞാൻ ചെയ്യുന്നത് തുടരാനാണ് അദ്ദേഹം എന്നോട് പറഞ്ഞു. പരസ് സാറും (ബൗളിംഗ് കോച്ച് ) എന്റെ പുറകിൽ നിൽക്കുന്നുണ്ടായിരുന്നു, ഓരോ പന്ത് കഴിയുമ്പോഴും അദ്ദേഹം എന്നെ നയിക്കുകയായിരുന്നു. അത് എനിക്ക് വളരെയധികം ആത്മവിശ്വാസം നൽകുന്നതായിരുന്നു, ”ഉമ്രാന്‍ കൂട്ടിച്ചേർത്തു.
ഉമ്രാന്‍ ടീമിലുണ്ടെങ്കിലും പ്ലെയിങ് ഇലവനിൽ ഇടം നേടാനുള്ള സാധ്യത വിരളമാണ്. ഹർഷൽ പട്ടേൽ, ഭുവനേശ്വർ കുമാർ, അവേഷ് ഖാൻ, അർഷ്ദീപ് സിംഗ് എന്നിവരിൽ നിന്ന് ജമ്മു പേസർക്ക് കടുത്ത മത്സരമാണ് നേരിടുന്നത്. പരമ്പരയില്‍ 5 ടി20 മത്സരങ്ങളാണ് ഒരുക്കിയട്ടുള്ളത്.
