ലോക ഒന്നാം നമ്പർ ബൗളർ രവിചന്ദ്രൻ അശ്വിനെ ലോക ടെസ്റ്റ് ചാമ്പ്യൻഷിപ്പ് ഫൈനലിൽ നിന്ന് ഒഴിവാക്കാനുള്ള കടുത്ത തീരുമാനം സാഹചര്യങ്ങളുടെ അടിസ്ഥാനത്തിലാണെന്ന് ഇന്ത്യൻ ബൗളിംഗ് കോച്ച് പരാസ് മാംബ്രെ പറഞ്ഞു. ഓസ്ട്രേലിയക്കെതിരെയുള്ള ഫൈനലില്‍ അശ്വിനെ ഒഴിവാക്കി ജഡേജ ഏക സ്പിന്നറായുള്ള ടീമിനെയാണ് ഇന്ത്യ അവതരപ്പിച്ചത്. പേസിന് മുന്‍ഗണന നല്‍കിയ ലൈനപ്പിന് ആദ്യ ദിനത്തില്‍ ഓസീസിനെ പിടിച്ചു നിര്‍ത്താനായിരുന്നില്ലാ.
“അദ്ദേഹത്തെപ്പോലുള്ള ഒരു ചാമ്പ്യൻ ബൗളറെ പുറത്താക്കുന്നത് എല്ലായ്പ്പോഴും വളരെ ബുദ്ധിമുട്ടുള്ള തീരുമാനമാണ്. രാവിലത്തെ സാഹചര്യങ്ങൾ നോക്കിയപ്പോൾ ഒരു അധിക സീമർ ഗുണം ചെയ്യുമെന്ന് ഞങ്ങൾ കരുതി. ഇത് ഞങ്ങൾക്കായി മുൻകാലങ്ങളിലും പ്രവർത്തിച്ചിട്ടുണ്ട്. സീമർമാർ ഞങ്ങൾക്ക് വേണ്ടി ഇവിടെ നന്നായി ചെയ്തു. പേസര്‍മാര്‍ നേരത്തേ പല മികച്ച പ്രകടനങ്ങളും നടത്തിയിട്ടുണ്ട്. പിറകിലേക്കു നോക്കി ഒരു അധിക സ്പിന്നറെ ഇറക്കിയാല്‍ മുതല്‍ക്കൂട്ടായി മാറുമായിരുന്നെന്നു നിങ്ങള്‍ക്കു എല്ലായ്പ്പോഴും പറയാം, പക്ഷേ സാഹചര്യങ്ങൾ നോക്കിയാണ് ഞങ്ങൾ ഈ തീരുമാനം എടുത്തത്, ”
മത്സരത്തില്‍ ഇന്ത്യക്ക് തിരിച്ചെത്താന്‍ കഴിയുമെന്നും ഇന്ത്യന്‍ ബൗളിംഗ് കോച്ച് വിശിദീകരിച്ചു. “രണ്ടാം ന്യൂബോള്‍ കുറച്ച് സഹായിച്ചു. മോണിംഗ് സെഷൻ പ്രധാനമാണ്. ഇന്നത്തെ അവസാന രണ്ട് സെഷനുകളിൽ വിക്കറ്റ് ഞങ്ങൾ പ്രതീക്ഷിച്ചതിലും നന്നായി കളിച്ചു, ”അദ്ദേഹം പറഞ്ഞു.
മത്സരത്തില്‍ ഉമേഷ് യാദവ് 14 ഓവർ മാത്രമാണ് പന്തെറിഞ്ഞത്, താരത്തിന് ഫിറ്റ്‌നസ് പ്രശ്‌നങ്ങളൊന്നുമില്ലെന്ന് മാംബ്രെ പറഞ്ഞു. ബൗളർമാർക്ക് കൂടുതൽ മികച്ച പ്രകടനം നടത്താൻ കഴിയുമായിരുന്നുവെന്നും അദ്ദേഹം പറഞ്ഞു.
“ബോളിംഗില്‍ കൂടുതൽ അച്ചടക്കമുള്ളവരാകാമായിരുന്നു. 12-13 ഓവർ കഴിഞ്ഞപ്പോൾ ഞങ്ങൾക്ക് അച്ചടക്കം നഷ്ടപ്പെട്ടു. ഞങ്ങൾ കൂടുതൽ റൺസ് വഴങ്ങിയതായി എനിക്ക് തോന്നി,” നേരത്തെ തന്നെ ഷോർട്ട് ബോൾ തന്ത്രങ്ങൾ പ്രയോഗിക്കാമായിരുന്നുവെന്ന് അദ്ദേഹം കൂട്ടിചേര്‍ത്തു.
